بسم الله الرحمن الرحيم
السلام عليكم ورحمه الله وبركاته وبعد
نقدم لكل طلاب الثانوية العامة ، شرح وافي وكامل لطريقة كتابة الرغبات في تنسيق الجامعات الكترونيا، ننقل لكم التفاصيل كاملة على موقع أكاديمية كتاتيب مصر تابعو معنا هذا المقال..
تحميل شرح طريقة كتابة رغبات تنسيق الجامعات وأهمية ترتيبها
اخبار تنسيق الجامعات 2024
طريقة كتابة الرغبات و أهمية ترتيبها .
في عندنا طريقتين لكتابة الرغبات :
الطريقة الأولـــــى :
في حالة انك محدد كليه معينة حابب انك تدخلها ودا بغض النظر عن محافظة الكلية .
مثال للتوضيح نفترض مثلا أن الكلية دى كلية حقوق و عايز تدخلها حتى لو فى محافظه بعيدة ، هتلاقي نقطة واحدة نراعيها وهي التوزيع الجغرافي . تابع وهشرح
بعد دخولك الموقع بيقولك دخل كلية ، هتدخل حقوق مثلاً ، بيبقي جنبها حرف ” أ ” الأول
( يعني أنك بتدخل المحافظات بالترتيب الاقرب ليك انت ” دا اسمه التوزيع الجغرافي ” ، والموقع بيوجهك لده من البداية )
– ثم “ب ” ثم ” ج ” ثم باقى المحافظات بالترتيب اللى عايزه ودا زي ما اتفقنا أسمه التوزيع الجغرافى يا شباب .
مش فاهم لساا !!! ايه ” أ ” ، ” ب ” ده ؟
معنى ” أ ” ان الموقع بيقولك دى أقرب جامعة لمحافظتك ” ب ” أبعد شوية و ” ج ” أبعد اكتر وهكذا ، والباقى بيقولك بتكمل زي ما انت عايز خلاص .
ايه لازمة دا طيب ؟؟
دلوقتي انت اخترت كليه فبتدأ تكتب الكلية دي في كل المحافظات الموجودة بس بترتيب الأقرب و بعدين الأبعد و هكذا .. فدلوقتي لو الأقرب دي كانت بتقبل مجموع اكبر من مجموعك فكدا مش هتتقبل فيها و هتنزل على إلى بعدها وهكذا هتتقبل في كلية بتقبل من مجموعك .
مثال للخطوات :
انا محافظة الدقهلية مثلا فبحط المحافظة بتاعتي في أول اختيار وبعدين الأبعد وهكذا .
1- حقوق المنصورة نطاق ” أ ”
2- حقوق دمياط نطاق ” أ ”
3- حقوق الزقازيق ” أ ”
4- حقوق طنطا ” ب ”
5-حقوق بنها ” ب ”
6- ونكمل بقى حقوق باقي المحافظات بمزاجك بس الموقع هيجبرك * تدخل اللى فوق الأول ثم باقى المحافظات .
خلصت كلية حقوق ؟
هتدخل على الكلية التانية اللى عايز تدخلها حتى لو فى محافظه تانية وهتمشى بنفس الخطوات وهكذا .
الطريقة الثانية :
في حالة ان مفيش كلية معينة بفكر فيها بس عايز حاجة * من محافظتي *
_ كتابة الرغبات هتكون كالاتي :
1- حقوق المنصورة و هكذا لحد ما تخلص حقوق
2- تجاره المنصورة و هكذا لحد ما تخلص تجاره
3- آداب المنصورة و هكذا لحد ما تخلص آداب
4- تربية المنصورة و هكذا لحد ما تخلص تربية
5- حقوق دمياط و هكذا لحد ما تخلص تجاره
6- تجاره دمياط و هكذا لحد ما تخلص تجاره
7- آداب دمياط و هكذا لحد ما تخلص آداب
وهكذا باقى الكليات بنفس الترتيب بقي تكمل
ملحوظة :-
ترتيب الرغبات مهم جداً جداً لان موقع التنسيق اول حاجة بيشوفها هو الكليه من مجموعك ولا لأ ، لو مجموعك تمام قبلت ، لو لأ خلاص بتنزل على إلى بعدها و هكذا و هكذا لحد ما يوصل لأول كلية واخدة من مجموعك بتتقبل فيها و عشان كدا
مهم جداً جداً الترتيب .
ابطال الثانوية العامة
دلوقتي هنا في نصائح مهم جداً وانت بتكتب الرغبات .
◽1- حاول على قد ماتقدر تكتب الرغبات كلها ، واستغل كل رغبة واكتبها وراعي جداً جداً و للمرة المليون ترتيب الرغبات دي * ، والسبب أن أول كليه فيهم مجموعك هيجيبها هتتقبل فيها علطول ، فعشان متندمش بعد كدا .
◽2- فى نظامين لكتابة التنسيق زي ما اتكلمت قبل كدا .
انت هتشوف انت حابب انهي نظام فيهم و تمشي عليه .
◽النظام الاول
– لو انت مقرر كلية معينة وعايزها برغبة شديدة جداً يبقي هتكتب الكلية فى نطاق ” أ ” الأول ثم ” ب ” ثم ” ج ” ثم باقي المحافظات الموجودة كلها عشان تتقبل في اقرب محافظة ليك وكمان اول محافظة بتقبل من مجموعك ، وبعدين تدخل على الكلية التانية بقي وهكذا .
◽النظام الثاني
– لو انت مش عايز تروح مكان بعيد عن محافظتك ف هتكتب كل الكليات اللى فى محافظتك انت الأول ودا علشان انت مش عايز تغترب وكمان مش فى دماغك كلية معينة .
◽3- رقم الجلوس هيكون مطلوب منك اول ما تدخله اتاكد من بياناتك كويس جداً و مجموعك .
◽4- اقرا قواعد التوزيع الجغرافي و التوزيع الأقليمى كويس قبل ماتبدا الرغبات خالص .
◽5- حاول تجيب ورقة و قلم و تكتب الرغبات و ترتبهم مع نفسك كويس جدا فى الورقة الأول و بعدين دخلهم على الموقع .
◽6- الموقع بيفضل فاتح 3 أيام او اكثر كمان تقدر خلال 3 أيام دول تعدل فى رغباتك ، لكن مفيش داعي نلجئ للتعديل يا شباب ، ركز كويس جداً ورتب اولوياتك بمنتهي الدقة وبعدين قدم الرغبات .
7- تحذير
رقم جلوسك و الرقم السرى بتاعك محدش يعرفهم غيرك أو حد كمان موثوق منه جداً وبس ، عشان متتعرضش لأن حد ممكن يغير رغباتك .
_ متلجئش أبداً لحد من فيسبوك متعرفهوش أنه يعملك دا ، لأ لأ و ثم لأ ، ممكن يساعدك في الخطوات واحدة واحدة بس مش اكتر لكن انت تعمل كل حاجة بنفسك و عشان تكون متطمن حتي .
◽8- بعد ماتخلص الرغبات اتاكد أنك كتبتهم كلهم كاملين و صورهم بالموبايل أو خد اسكرين مثلا ودي خطوة تبقي معاك للامان مش أكتر .
◽9- مجموعك غير مجموع صاحبك عشان كدا اوعي» تفكر تكتب الرغبات وتظبط معاه على نفس الترتيب ، لأن هتكون ضيعت نفسك وكمان مش هتبقي معاه .
استعدادًا لتنسيق الجامعات الحكومية والمعاهد:
التعليم العالي تنشر انفوجرافات حول تنسيق القبول بالجامعات الحكومية والمعاهد لطلاب الثانوية العامة في “سؤال وجواب”
استعدادًا لبدء تنسيق القبول بالجامعات الحكومية والمعاهد لطلاب الثانوية العامة المصرية، وجه الدكتور أيمن عاشور وزير التعليم العالي والبحث العلمي، بإتاحة كافة المعلومات التي من شأنها مساعدة طلاب الثانوية العامة على الاستخدام السليم لموقع التنسيق الإلكتروني، وتعريف الطلاب بكافة المعلومات التي تساعدهم أثناء مراحل التنسيق المُختلفة، واختيار رغباتهم بدقة؛ للالتحاق بالجامعات الحكومية والمعاهد.
وتتضمن الانفوجرافات الحالية العديد من الأسئلة التي يبحث طلاب الثانوية العامة عن إجاباتها عند تسجيل رغباتهم للالتحاق بالجامعات الحكومية والمعاهد.
وتُهيب وزارة التعليم العالي بوسائل الإعلام المختلفة، نشر الأدلة الإرشادية والوسائل التوضيحية للطلاب؛ لتعريفهم بها خلال فترة التنسيق الإلكتروني للجامعات الحكومية والمعاهد.
هذا، وسيتم نشر الأدلة الإرشادية وكافة الوسائل التوضيحية عبر الموقع الإلكتروني للوزارة والحسابات الرسمية لوزارة التعليم العالي والبحث العلمي على مواقع التواصل الاجتماعي التالية:
● الموقع الإلكتروني لوزارة التعليم العالي والبحث العلمي
https://mohesr.gov.eg/
● حساب وزارة التعليم العالي والبحث العلمي على (فيسبوك)
https://www.facebook.com/MOHESREGYPT
● حساب وزارة التعليم العالي والبحث العلمي على (انستجرام)
https://www.instagram.com/mohesregypt
● حساب وزارة التعليم العالي والبحث العلمي على (إكس)
https://x.com/Mohesregypt
● حساب وزارة التعليم العالي والبحث العلمي على منصة (ثريدز):
https://www.threads.net/@mohesregypt
الإدارة العامة للمكتب الإعلامي والمتحدث الرسمي للوزارة
لمزيد من المعلومات والتفاصيل نرجو منكم متابعتنا على صفحتنا على فيسبوك من الرابط التالي
https://www.facebook.com/ktateb
خالص تمنياتنا لكم بالتوفيق لجميع الإخوة الزملاء المعلمين والمعلمات وابنائنا الطلاب والطالبات في جميع المراحل التعليمية وانتظروا المزيد من اخبار وأدوات التعليم والملازم والمراجعات على موقع أكاديمية كتاتيب مصر تابعونا.
