الفرق بين كليات الفنون التطبيقية و الفنون الجميلة و التربية الفنية

بسم الله الرحمن الرحيم

شرح الفرق بين كليات الفنون التطبيقية و الفنون الجميلة و التربية الفنية

الفرق بين فنون تطبيقية & فنون جميلة & تربية فنية
هم 3 كليات منفصلة .. كل كلية لها امتحان للقدرات منفصل
– كلية الفنون الجميلة
– كلية الفنون التطبيقية
– كلية التربية الفنية
__________________
1️⃣فنون جميلة:
– مفيش غير 6 كليات بس فنون جميلة في مصر اللي هم في جامعات حلوان – إسكندرية – الأقصر – المنيا – المنصورة – أسيوط
– الكلية بيدخلها علمي الشعبتين و أدبي (قسم جرافيك وتصوير ونحت )
– الكلية 5 أقسام :
– قسم العمارة (علمي رياضة فقط)
– قسم الديكور (علمي فقط)
– قسم الجرافيك
– قسم النحت
– قسم التصوير
1- ديكور: بيدخلها علمي بس الشعبتين (ادبي فى اسكندرية فقط)، بيخرج مهندسين ديكور.
2- عمارة: علمي رياضة فقط، زي قسم عمارة في هندسة بالضبط لكن بيتفوق عليه في الفري هاند .. يعني مهارات الطلبة اليدوية بتكون أحسن وبياخد مجموع اعلى من ديكور وأقل من هندسة.
3- تصوير : علمي و أدبي، تصوير زيتي وجداري (المقصود بتصوير الرسم مش التصوير الفوتغرافي)
4- جرافيك: علمي و أدبي، إعلانات وكارتون وفن كتاب والتصميم عموماً.
5- نحت: علمي و أدبي، بجانب النحت خريجين القسم ده بيشتغلو في مصانع العربيات والموبيلات في التصميم بتاع المنتج ومجالاته كتيرة ومتاحة جداً.
_______________________
2️⃣فنون تطبيقية:
_الكلية بتاخد من علمي فقط
_في منها 3 كليات بس في مصر (حلوان ودمياط وبنها وبني سويف)
_الكلية 14 قسم
_تبع نقابة المصممين أو مصممي الفنون التطبيقية وفيها قسمين تبع نقابة المهندسين ( نسيج و طباعة المنسوجات).
=الأقسام:
• الإعلان.
• الطباعة والنشر والتغليف.
• الأثاثات والإنشاءات المعدنية والحديدية.
• التصميم الداخلى والأثاث.
• التصميم الصناعى.
• الخزف.
• الزجاج.
• الزخرفة.
• الغزل والنسيج والتريكو.
• الملابس الجاهزة.
• المنتجات المعدنية والحلى.
• النحت والتشكيل المعمارى والترميم.
• طباعة المنسوجات والصباغة والتجهيز.
• الفوتغرافيا والسينما والتليفزيون.
_______________________
3️⃣تربية فنية:
_مقرها في الزمالك شارع إسماعيل محمد .. هي بالضبط قدام فنون جميلة بالزمالك.
_اقسام ومجالات الكلية: طباعة، نحت، خزف، نجارة، أشغال يدوية (فن شعبي)، تصميم، تصوير.
_مفيش أقسام للكليه غير في سنة 3 و بيبقوا تثقيفى وتربوى موقع رؤية التعليمي
قسم التثقيف بالفن بندرس فيها فلسفة فن ونقد وتذوق فنون .. أما التربوى علم نفس اكتر.
_مفيش فرق بين أدبي وعلمي في الكلية
_تثقيفى بيبقوا ليهم الأحقية يشتغلوا في قصور الثقافة زى المتاحف ودار الأوبرا و هكذا.
_تربوى ليهم الأحقية يشتغلوا مدرسين رسم (دراسة مواد تربوية)
_طباعة تصوير تصميم نسيج أشغال نحت خزف دى المواد العملي
_المواد النظرى بقى تاريخ تربية فنية – عربى – English – تشريح.
============================
أهم حاجة عشان تقدر تدخل أي كلية منهم تقدم على اختبار القدرات..
و قولنا فالكومنتس عايزنا نتكلم عن انهي كلية بالتفصيل اكتر

أقسام كلية الفنون التطبيقية

كلية النص مهندس والتاني فنان

بما إننا هنبدأ ف كليات الفنون
ف خلينا نبدأ بحل لغز كليات الفنون باسماءها بالشعب ال بتقبل منها :
📍الفنون التطبيقية: بتقبل من علمي رياضة – علوم
📍الفنون الجميلة: ودي متقسمة لـ 3 أجزاء:
– قسم عمارة: بتقبل من علمي رياضة بس
– قسم ديكور: بيقبل من علمي علوم – رياضة
– فنون (ال هي باقي الاقسام): بتقبل من علمي وأدبي
📍التربية الفنية: بتقبل من جميع الشعب

🎨 فنون تطبيقية من الكليات ال لازم تنجح ف امتحان القدرات بتاعها عشان تتقبل فيها + المجموع بتاعك.
(هنقول تفاصيل أكتر عن القدرات ف أول كومنت)

📍السؤال الأذلي عن فنون تطبيقية، هو لازم أكون باعرف ارسم كويس عشان ادخل فنون تطبيقية؟
لأ مش لازم، أنت بتحتاج اساسيات ف الرسم وبتقدر تتعلمها ف الكلية ببساطة، لأن الرسم مهارة مش موهبة يعني مش لازم تتولد بيها لكن عادي جدا تتعلمها ودا عن تجربة جدا ع أكتر من شخص 🤠

📍 الدراسة:
أساس فنون تطبيقية هو التصميم، ف كل المواد ف الخمس سنين بتخدم إنك تكون خريج قادر تصمم أي عمل فني بناء ع أساسات مش بعشوائية.

الكلية 5 سنين مقسومة سنة اعدادي و4 سنين تخصص..
– سنة اعدادي (ف جامعة دمياط اسمه القسم العام): ودي هتاخد فيها مواد تأسيسية ف التصميم زي أسس تصميم، ومنظور حر/هندسي، خطوط، متاحف، رسم هندسي، هندسة وصفية.
وفي مواد عامة زي الفيزيا والكميا والميكانيكا والديناميكا، بتكون سهلة جدا وبسيطة حتى لو إنت علمي علوم بتقدر تفهم المواد الرياضية كويس عادي.

– التخصص:
⚠️توضيح إن ف تعريفك سنوات الكلية، بتقول أنا أولى تخصص، ال هي تانية جامعة لأن عندك سنة اعدادي
⚠️ طيب فنون تطبيقية موحودة ف جامعات إيه اصلا ؟
موجودة ف 4 جامعات حكومية (حلوان وبنها وبني سويف ودمياط).
⚠️ بيكون في تنسيق داخلي للتخصصات بعد سنة اعدادي، بيكون نفس النظام بتاع ثانوي إنك بعد النتيجة بتدخل الرغبات بتاعتك وبعدين بتظهر النتيجة وبعدين بيظهر تنسيق الأقسام وبتعرف إنت اتخصصت إيه.
⚠️ الأقسام الأساسية = 14 قسم موجودين كلهم ف جامعة حلوان وجامعة دمياط، لكن بنها وبني سويف فيهم اقسام ناقصة.

📍الأقسام:
1️⃣ قسم الفوتوغرافيا والسينما والتليفزيون: من اسمه، فأنت بتتعلم فيه اساسيات تصوير سواء صور أو أفلام قصيرة أو طويلة أو برامج تليفزيونية، لأنك بتتعلم فيها اضاءة وكاميرات
⛔ ممكن تشتغل كمخرج سواء برامج أو أفلام، وممكن يبقي لك الكارير بتاعك ف الأفلام القصيرة وتدخل بيها مسابقات.
⚠️ مش موجود ف بنها وبني سويف

2️⃣ قسم الطباعة والنشر والتغليف: ودا القسم ال بيهتم بالمطبوعات الورقية والبنارات، زي الكتب والمجلات وبنارات الاعلانات ال بتبقي متعلقة سواء ف الشارع او ع الكباري وغيره.
وكمان بيهتم بعلب التغليف للمنتجات ال بتتباع، سواء المنتجات الغذائية زي الشيبسيهات والمكرونات وهكذا، أو غيره.
⛔ بتشتغل ف المطابع، زي مطابع الاهرام والجمهورية، أو شركات التعبئة والتغليف ودي كتيير جدا.

3️⃣ قسم الدعاية والإعلان: أي شركة دلوقتي سواء start up او شركة بقالها مدة مش بتتحرك من غير لوجو، أو شعار ليها، دا جزء من مهام قسم الاعلان، وكمان الاعلانات التليفزيونية وأفكارها، والبوسترات سواء التوعوية او الاعلانية ال بتنزل ع الكباري او بتتعرض ف الشوارع، وكمان بيتعلموا أنميشن وتحريك.
⛔ ممكن تشتغل في شركات الدعاية والاعلان، ودي بيكون الشغل فيها عن طريق عميل فرد أو شركة بيجي يتفق مع الشركة ع فلوس معينة لشغل معين، بعد كدا بيبدأ يقعد معاك كمصمم اعلانات ويقولك هو عايز إيه بالظبط، وإنت تبدأ تصيغ دا ف صورة اعلان.
أو ممكن تشتغل شغل حر freelancer ودا مشكلته إن انت ال بتتفق مع العميل ع الفلوس والوقت وكل حاجة وكمان بتعرف متطلباته وبتشتغل، وكمان بتحتاج تبني اسم كويس ف السوق عشان الناس تيجيلك وتتعامل معاك مباشر، ميزته إنك بتكون حر نفسك بتظبط وقتك زي ما تحب على حسب نظام يومك مش مضطر تنزل الساعة 8 وتروح الساعة 5 .
في جامعة بنها، قسم التاني والتالت متجمعين ف قسم واحد اسمه دعاية واعلان وطباعة ونشر، وبيدرسوا مواد التخصصين مع بعض ف الاربع سنين.
مش موجودين ف بني سويف

4️⃣ قسم التصميم الداخلى والأثاث: ودا بيهتم بالتصاميم الداخلية لأي مبني، بيكون هو وقسم عمارة ف هندسة مكملين لبعض، مع إن تصميم داخلي بياخد جزء معماري وكذلك عمارة بياخد جزء تصميم داخلي.
وكمان تصميم داخلي متوسع شوية لانه ممكن يهتم بالديكورات الداخلية للمسارح أو الكادارات التليفزيونية، أو ديكورات الافلام.
وكمان إنه بيبقي فيه جزء أثاثي، فانت بتتعلم عن انواع الاخشاب واشكالها وايه نستخدمه فين وهكذا.

ممكن تشتغل ف مكتب تصميم داخلي او مكاتب تصميم العمارة.

5️⃣ قسم التصميم الصناعي: في بعض الكليات اسمه تصميم منتجات، وبيهتم بتصميم الديزاين الخارجي لأي منتج صناعي من الابرة للصاروخ حرفيا 😎.
وبيكون مكمّل لقسم هندسة ميكانيكا، مع إنهم ف تصميم صناعي بياخدي جزء ميكانيكي لكنه بيكون سهل وبسيط للمنتجات البسيطة سواء اليدوية أو الكهربية.

شغلك بيكون ف مصانع المنتجات، بيكون في سيكشن اسمه البحث والتطوير ف المصانع ودا ال بيكون مسئول إنه يحط الديزاينز الخارجة سواء لمنتجات جديدة أو تطوير ع منتجات موجودة بالفعل.

6️⃣ قسم الاثاثات المعدنية والإنشاءات المعدنية والحديدية: بيهتم بالاثاث المعدني زي مثلا لما بتدخل أي عيادة بتلاقي كراسي او مقاعد معدنية، وأي كراسي او مقاعد معدنية بيكون دا جزء من شغله، لكن هو بيتوسع أكتر من كدا كمان.

7️⃣ قسم المنتجات المعدنية والحُليّ: طب إيه الفرق بينه وبين الأثاثات المعدنية؟ إن دا بيهتم بالمنتجات البسيطة زي المكتبات المعدنية أو التابلوهات المعدنية وغيره، مش بيتدخل أوي ف الأثاثات، وكمان دا بيكون زايد عليه إنه بيهتم بالأكسسوريز المعدنية وكمان حلي البيوت زي الاباليك والنجف.

شغله كحلي بيكون في شركات الذهب أو المديليات المعدنية أو العملات المعدنية وغيره وكمان شركات النجف والكرستالات زي كرستال عصفور.
في حامعة بنها،️ القسم ال 6 وال 7 مجموعين ف قسم واحد.

مش موجودين ف جامعة بني سويف.

8️⃣ قسم الخزف: بيتعلموا فيه تقنيات ووسائل الخزف المختلفة، بيدرسوا أنواع الأطيان(جمع طين)وبيحللوها عشان يعرفوا أنهي نوع يستخدم ف إيه، وبيعرفوا عن الافران الحرارية وازاي يستخداموها وكمان صيانتها، وبيتدربوا ع تصميم الخزف الصناعي واليدوي والدولاب.
مش موجود ف بنها وبني سويف

9️⃣ قسم الزجاج: بيدرسوا فيه كل حاجة ليها علاقة بالزجاج وبالتالي بيقدروا يوظفوها ف كل حاجة بعد كدا، سواء مباني معمارية او العبوات الزجاجية زي البرطمانات والازايز، وغيرهم..
وكمان بيتعلموا وسائل ترميم الزجاج والرسم عليه ممكن تسيرش عليه، هتشوف شكله وبيكون من الحاجات المطلوبة جدا وكمان اسعارها عالية.
⚠️مش موجود ف بنها وبني سويف

🔟 قسم الزخرفة: بيتعلموا التنسيقات الجمالية للاماكن سواء الداخلية او الخارجية، ودا بيكون واسع جدا بقي سواء ميادين او حدائق او منازل بتصميم ورق الحائط وغيرها.
⚠️مش موجود ف بنها وبني سويف

1️⃣1️⃣ قسم النحت والتشكيل المعمارى والترميم: ودا بيهتم ب3 أجزاء، اول حاجة المنحوتات المعمارية ال بتكون في أي مكان اثري، أو قصور والنصب التذكارية وهكذا..
تاني حاجة بيهتم بالترميم ف المنشآت الأثرية، زي المساجد والمتاحف، لو نزلت المعز هتلاقي مهندسين نحت، أو كلية آثار شغالين ف الترميم ف اجزاء كتير منه.
⚠️ مش موجود ف بني سويف.

1️⃣2️⃣ الغزل والنسيج والتريكو: ودا القسم ال بيهتم بالخيوط والأنسجة عشان نطلع القماش ايا كان شكله او خامته أو نوعه، وكمان شغله ف السجاد بيكون كويس جدا لأن السجاد عبارة عن خيوط مترتبة بشكل معين بيدينا شكل السجادة
⛔ فشغله بيكون في الانسجة المنتشرة جدا ف المحلة الكبرى، أو مصانع السجاد زي النساجون وسيرا وغيرهم. موقع رؤية التعليمي

1️⃣3️⃣ قسم طباعة المنسوجات والصباغة والتجهيز: أي بيجامة أو ملاية دلوقتي بيكون الشغل ال عليها مطبوع، القسم دا هو ال بيهتم بالديزاينز دي يكون شكلها حلو ولذيذ وكمان بيتعلم ازاي يطبع اي ديزاين ع اي قماشة وطريقة الطباعة بتختلف ع حسب القماشة هو بيتعلم دا بقي

1️⃣4️⃣ قسم الملابس الجاهزة: هو تصميم الازياء، بس كدا ؟ اومال انت فاكر ايه
لكنهم بيتعملوا ازاي يصمموا ملابس جاهزة لكل الاعمار السنية من كبير لصغير، وكمان بيتعلموا يعملوا منتجات جلدية سواء شنط او غيرها.
⚠️ مش موجود ف بني سويف

⚠️ يبقي المجموع 8 اقسام ف جامعة بنها، و4 أقسام في جامعة بني سويف،، وممكن تحول بعد اعدادي من جامعة لجامعة، لكن بيكون التحويل صعب شوية ولازم تتحرك فيه من بدري.
⚠️ اقسام فنون تطبيقية من أكتر المجالات ال بتكون مطلوبة ف سوق الشغل، فأنت بمجرد ما بتتخرج بتلاقي شغل مناسب ليك ف اكتر من مكان، المهم إنك تكون شغال ع نفسك كويس ومش معتمد بس ع الكلية. موقع رؤية التعليمي

📍طبيعة الدراسة:
1. جزء عملي: ودا جزء كبير جدا ومهم جدا ف الكلية ف اي تخصص، ودا ال بنعمل فيه مشاريع ولوحات وبنسهر ف الكلية ونطبق ف البيت بالأيام عشان ننجزه وممكن بعد دا كله يترفض وتروح تعيده زي العسل كدا

2. جزء نظري: هو مهم جدا عشان المعلومات النظرية بتساعد ف التطبيق، لكن مش بيحتاج مجهود ومعظم الدكاترة بيكونوا مقدرين إننا مسحولين ف العملي فبيسهلوا علينا النظري

خالص أمنياتنا بالتوفيق لجميع الطلاب ان شاء الله في جميع المراحل الدراسية انتظرو كل ماهو جديد يخص أخبار وأدوات التعليم على منصة كتاتيب مصر