بسم الله الرحمن الرحيم
بعد انتهاء مرحلة الحفظ فقط في التعليم والتركيز على الفهم أولا بجانب الحفظ وتغيير نظام الامتحانات والظلم الكبير الذي وقع على دفعة 2021
اصبح من واجبنا في #كتاتيب ان نقوم بتقديم النصائح للطلاب دفعة 2022 سائلين المولى عز وجل أن يجعله اسعد الاعوام على جميع الطلاب في ربوع مصرنا الحبيبة
اهم نصايح لدفعة الثانوية العامة ٢٠٢٢
١- دايما فيه وقت حتى لو انت شايف عكس كدا
٢- عادي جدا انك تفضل ملخبط دروس اول شهرين بس بعد شهر ١٠ لازم تظبط امورك
٣- ماتشدش المذاكرة في الاول،
ماتشدش في المذاكرة في الاول،
ماتشدش في المذاكرة في الاول،
ماتشدش مذاكرة في الاول،
كفايه اوي اوي اوي حل الواجب وحفظ كلمات مثلا او حاجه، كدا كدا الحاجات اللي في الاول دي بتكرر كتير وكمان ماعليهاش درجات كتير وهتفقد شغفك من البداية
٤- الصلاة مهمة عشان قلبك يكون مطمن وتحس انك مستشعر ربنا في كل وقت..
مش مجرد انك تصلي عشان توصل لهدفك “ودا طبعاً عامل اساسي”
٥- اياك ثم اياك انك تفضل مع مدرس انت مش مستريح معاه نفسياً حتى لو هو مشهور وطلاب كتير بتاخد معاه..
مدرس مستريح معاه نفسيا ومتوسط في الماده هيعرف يحببك في الماده وهتذاكرها كتير وانت هتحصل اكتر بكتير
٦- دايما فيه وقت حتى لو انت شايف عكس كدا
٧- ماتاخدش السنة لوحدك..
السنه هتبقى احلى لو معاك حد يشجعك وماشي معاك الطريق من اوله “طبعا المحبطين واللي كلامهم سم ابعد عنهم مش بس السنه دي.. ابعد عنهم على طول”
٨- ماتحفظش، ماتضيعش وقت في الحفظ، افهم من كذا مصدر ممكن من مدرس السنتر مرة ومن اليوتيوب مرة تانية من أي مدرس اونلاين
“اي مدرس يقولك احفظ سيبه حتى لو هو معروف ومشهور “
٩- لا تؤجل اي مذاكرة عليك حتى لو كانت صفحة مثلا
١٠- اكتب في كتاب المدرسة من الاول اللي انت عاوزة وذاكر منه عشان في الاخر يكون سهل معاك في الامتحان وفيه اكبر كم من المعلومات اللي وقفت عليك
١١- الفيزياء والكيمياء دايما محتاجين مراجعة عشان دايما بيتنسوا على عكس باقي المواد التانية
١٢- اللغة التانية لو ما اهتميتش بيها من الاول هتبقى عقدة وهي اصلا مش مستاهلة
١٣- الفيزيا سهلة، ماتصدقش اي حد يقولك عكس كدا..
هي بس عاوزه واحد دماغه شغالة
١٤- حل كتابين في كل مادة من اول السنة هتستريح في الاخر
١٦‐ عادي يجيلك فتره وتفقد شغفك، ممكن الفترة دي تقعد اسبوعين او تلاته..
ارجوك ارجوك ماتخليهاش تقعد اكتر من كدا واطلع منها بسرعه بأي طريقة
١٧- دايما فيه وقت حتى لو انت شايف عكس كدا
١٨- مش هقولك السنه سهله نفسيا..
السنه مقرفة نفسيا بس الشاطر واللي بيجيب مجموع هو اللي بيقدر يتخطى اي مشكله نفسية ويطلع سليم
١٩- اعمل اللي عليك عشان متندمش وتعيش في دوامة جلد الذات
٢٠- دايما ربنا له حسابات غير..احسن الظن في الله العظيم وبس
٢١- اتعلم تقلل موبايل على مدار الخمس شهور الاولى في السنه عشان تستريح في الاخر
٢٢- دايما فيه وقت حتى لو انت شايف عكس كدا
في النهاية
نتمنى من الله ان يوفق جميع أبنائنا الطلبة والطالبات لكل خير ويحقق كل امانيكم
والله الموفق والمستعان