مفهوم استراتيجيات القرائية لمعلمي المرحلة الابتدائية

بسم الله الرحمن الرحيم

من اهم ماتم اضافته في مناهج الابتدائية بعد تطويرها من قبل وزارة التربية والتعليم هو مفهوم استراتيجيات القرائية لمعلمي المرحلة الابتدائية في هذا المقال على كتاتيب اونلاين نقدم لكم شرح إستراتيجيات القرائية بشكل كامل تابع معنا.

هذا المقال هام جدا لمعلمي الصفوف الاولية وعشان كدة كل معلم ومعلمة او ولي امر ياخد المقال مشاركة علي صفحته ويحفظع عشان يبقي مرجع له وقت ما يحتاجه . القرائية مستمرة من الصف الاول للسادس.
…………………………………………………………
أولا :- تحليل الكلمات إلي مقاطع صوتية

لما ييجي سؤال حلل الكلمات إلي مقاطع صوتية هنعمل ايه :
هنقرأ الكلمة لو مش متشكلة في الورقة ونحاول نشكلها صح . مع انه المفروض تيجي الكلمة للطالب متشكلة و مضبوطة .
في قاعدة مهمة جدا لتحليل الكلمات لازم نعرفها
1- اللام القمرية مقطع.
2- اللام الشمسية والحرف المشدد اللي بعدها ناخد منه واحد مع اللام .
3- الحرف المتحرك مقطع
4_ الحرف المتحرك والمد لو جه بعده مقطع
5- الحرف الساكن والحرف اللي قبله مقطع
6- الحرف المشدد يتفك مرتين .الاول بيكون ساكن والتاني متحرك . .
( أمثلة )
البحر : ال/ بح / ر
الشمس: الش / شم / س
قمر : ق / م / ر
خالد : خا / ل / د .. رضا : ر / ضا
هند : هن / د
الطفل : الط / ط/ ف / ل
——-
ثانيا : شبكة المفردات

لما ييجي لك سؤال اكتب شبكة المفردات لكلمة كذا . المطلوب منك تفكر وتشغل دماغك وتجيب اربع كلمات تانية لها علاقة بالكلمة الاصلية وترتبط بها .
( مثال )
حديقة  زهور / فواكه / أغصان / مياة
مدرسة  فصول / معلمون / طرقات / فناء

ثالثا: خريطة الكلمة
——
لما يطلب من أبنك اكتب خريطة الكلمة كذا . يبقي المطلوب انه يعمل اربع حاجات يجيب ( معناها . عكسها . نوعها . يحطها في جملة )
مثال
السعادة  معناها الفرح / عكسها الحزن / نوعها اسم / الجملة : السعادة في القلوب
يتحدث  معناها يتكلم / عكسها يصمت / نوعها فعل / الجملة : يتحدث المعلم عن النظافة
———
رابعا: عائلة الكلمة

لما يطلب من ابنك يجيب عائلة الكلمة . يبقي المطلوب اربع كلمات من نفس جنس الكلمة الاولي .
مثال
درس مدرس / يدرس / مدرسة / دراسة / تدريس / دراسات
زرع  زراعة / زارع/ مزرعة / مزروع / زراعات
———-
خامسا دمج الاصوات

ده بقي أسهل حاجة ليه ؟ . لانه بكل بساطة هيجمع المقاطع جنب بعض ويكون منها كلمة
مثال
ادمج الاصوات الاتية
ح / لا / ل  حلال
إن / جا / زا / ت  إنجازات
———
سادسا: المعاني المتعددة

اقرأ أيضا : على كتاتيب

نماذج إرشادية لدروس منهج اللغة العربية للصف الرابع الابتدائي ٢٠٢٢

ده سؤال محتاج ذكاء و ثروة لغوية وهو انه مطلوب منه يفرق في المعني بين كلمتين شبه بعض في الشكل.
مثال
* صليت المغرب في المسجد
سافرت المغرب بالطائرة
المغرب الاولي : أسم صلاةوفرض من الفرائض
المغرب الثانية : اسم بلد عربي
* الجبن سلوك اللصوص
الجبن طعمه لذيذ
الجبن الاولي : صفة مذمومة
الجبن الثانية : طعام
———-
سابعا: الصفة المضافة

السؤال ده درجته مضمونة لانها بتتكلم عن النعت . هيطلب من ابنك انه يكمل الجملة بصفة مضافة او انه يختارها من بين الاقواس وهي صفة تصف المتحدث عنه
مثال
وقف التلميذ ………….طبعا هنختار كلمة المتفوق
ركبت القطار ……( الطازجة – السريع – المتفوقان )
—–
ثامنا: مفاتيح السياق

ده كمان سؤال صعب محتاج تركيز وهو انه هيجيب للطالب جملة فيها كلمة مش مفهومة و مطلوب منه استنباط معني الكلمة من خلال فهم الجملة .
مثال
* قص الاب حكاية
هات معني كلمة قص . ؟
طبعا معني قص حكي مش قطع ههههههههه
بس ايه اللي عرفني انها حكي مش قطع مفاتيح السياق اللي هي كلمة ( حكاية )
* عاد الاب مريضا
طبعا الكل هيقول عاد يعني رجع . ايوة صح √
بس لها معني تاني وهو زار
بس ايه اللي عرفني انها زار ؟
ايوة بالضبط كدة
كلمة ( مريضا)
في اجابة السؤال بكتب مفاتيح السياق وليس معني الكلمة .
1- هات مفاتيح السياق لما تحته خط في الجمل التالية
ا) * يقطف الطفل وردة ( معنى يقطف : يقطع / مفاتيح السياق لكلمة يقطف ( الطفل – الوردة )
الشرح : لو تأملنا هذه الجملة سنجد مفاتيح السياق لكلمة يقطف في الجملة ( الطفل – وردة ) وهى الكلمات التى فهمت من خلالها أن معنى يقطف يقطع
ب) يروى الفلاح الزرع ( معنى يروى : يسقى / مفاتيح السياق لكلمة يروى ( الفلاح – الزرع )
الشرح : لو تأملنا هذه الجملة سنجد مفاتيح السياق لكلمة يروى في الجملة ( الفلاح – الزرع ) وهى الكلمات التى فهمت من خلالها أن معنى يروى : يسقى
ج‌) منظر القمامة يؤذى العين ( معنى يؤذى : يضر / مفاتيح السياق لكلمة يؤذى ( القمامة / العين )
——-
تاسعا: شكل فن

مش هعرف ارسمه في الشرح بس اظن الناس فكراه من ايام الرياضيات اللي كنا بناخدها في اعدادي . وهو عبارة عن دايرتين متقاطعتين مع بعض . الجزء المشرك بينهم هنحط فيه الحاجات المشتركة بين الكلمتين و الباقي الاشياء المختلفة في الاماكن اللي مش مشتركة . هههههه
شايف واحد مطلع لسانه ومش فاهم . ماهو انا مش عارف ارسمهالك هههههه
المثال هيوضح
مثلا طلب منك شكل فن لكلمتين هما المدرسة و الحديقة .
* ايه الحاجات المشتركة 👈 مقاعد / زهور / رمال
* ايه الحاجات الموجودة في المدرسة ومش موجودة في الحديقة تلاميذ / حاسب ألي / فصول / معلمين .
* ايه الحاجات الموجودة في الحديقة ومش موجودة في المدرسة فواكه / أحواض / زهور / اقفاص / حيوانات

في النهاية أتمني أن يكون هذا العمل خالصا لوجه الله تعالي .

و ياريت الجميع يحتفظ به جدااااا لانه لا غني عنه طوال الست سنوات الابتدائية .

وفق الله من كتب هذا المقال وجعله في ميزان حسناته.