يقدم لكم موقع كتاتيب طريقة عمل الزيتون المخلل.

المقادير لكيلو زيتون أخضر ( تفاحى ) :

كيلو زيتون أخضر _ نصف كيلو ليمون _ فلفل أخضر حامى _ كرفس _ جزر أصفر مبشور _ معلقة صغير سكر _ وكل ليتر ماية بيآخد خمس معالق كبيرة ملح

الطريقة :

نغلى الماية ونتركها جانبا تبرد خالص

نذوب الملح والسكر فى الماية السكر علشان يخلى فى قرشة فى الزيتون

نغسل الزيتون جيدا … وبالسكينة نعمل شقوق فى الزيتون على حسب المدة اللى حنأكله فيها

برطمان نعمل فيه الزيتون شق واحد وده حيآخد أطول وقت فى التسوية

برطمان نعمل فيه الزيتون شقين وده حيآخد وقت أقل من البرطمان الأول

برطمان نعمل فيه تلات شقوق

برطمان نعمل فيه الزيتون أربع شقوق والبرطمان ده أول واحد هيستوى تقريبا بعد ٣:٤ أسابيع

كده هنحافظ على الزيتون من إنه يستوى فى وقت واحد ويتهرى مع الوقت

هنعصر الليمون بالعصارة ونحتفظ بالقشر

الفلفل الأخضر هنشيل العنق بتاعه ونقطع الواحدة على اتنين أو نخليها صحيحة ونعمل فيها فتحة بالسكينة على حسب مانتى عايزة درجة الاسبايسي للمخلل

 فى برطمانات زجاج حنبدأ نضع طبقة من الزيتون وطبقة من الجزر وشوية من الكرفس ونوزع الفلفل الحامى .. وهكذا حتى يمتلىء البرطمان و نكبسه ونغطيه بقشر الليمون ( نضع علامة على كل برطمان أو نرقمهم على حسب ترتيب الفتح عليهم )

نبدأ أولا بتوزيع عصير الليمون على البرطمانات بالتساوى ثم نكمل البرطمان بالماية المذاب فيها الملح

آخر حاجة نضع على الوش شوية من الزيت لعمل طبقة عازلة على وش البرطمان

نغطى البرطمان بكيس بلاستيك  أو البلاستيك استرتش ثم نحكم غلق غطاء البرطمان

نحتفظ بالبرطمانات فى المطبخ فى مكان على جنب علشان يبقى بعيدا عن الأيدى ونضع تحت البرطمانات كيس بلاستيك كبير للمحافظة على نضافة المكان علشان هنلاحظ إن البرطمانات هيحصل فيها فوران للسائل

 ملاحظة :

كل الخضار الجزر والكرفس والفلفل ليس لهم مقدار معين ده على حسب الرغبة ويمكن الاستغناء عن أى حاجة منهم

مش بنضيف خل لأن الليمون أفضل

لو بتخللى كمية كبيرة فعلشان متتعبيش فى عصر الليمون ممكن تقطعى الليمون قطع صغيرة وتضربيها فى الخلاط مع كوباية ماية وتصفيها وتآخدى السائل للمخلل وتغطى وش البرطمان باللى هيطلع فى الصفاية

طبعا لو احتاجتى ماية تانى بتدوبى ملح فى ماية زيادة بمعدل كل كوب ماية معلقة كبيرة ملح

يفضل استعمال برطمانات صغيرة علشان تخلص أول بأول وتفضل باقى البرطمانات مغلقة

لو الزيتون طلع حادق تطلعى من الزيتون على قدر إحتياجك وتنقعيه فى ماية مغلية مبردة حوالى ساعتين هتلاقى الطعم ظبط معاكى 

الزيتون التفاحى هو اللى لونه أخضر فاتح وقشرته مشدودة ومدور

مع تحيات موقع كتاتيب اونلاين